.jpg )
మిస్ ఆంధ్రప్రదేశ్ 2025 రన్నరప్గా బాపట్ల యువతి కోమల సాయి వడాలశెట్టి
* బాపట్ల పట్టణానికి వన్నె తెచ్చిన విజయం
విజయవాడలో ఇటీవల జరిగిన ప్రతిష్టాత్మకమైన "మిస్ ఆంధ్రప్రదేశ్ 2025" అందాల పోటీలలో స్థానిక యువతి,ప్రస్తుత అమలాపురం మున్సిపల్ కమీషనర్ నిర్మల్ కుమార్ కుమార్తె వడాలశెట్టి కోమల సాయి రన్నరప్గా నిలిచి సత్తా చాటారు.
తన అద్భుతమైన ప్రతిభ, ఆత్మవిశ్వాసం, వాక్చాతుర్యంతో న్యాయమూర్తులను, ప్రేక్షకులను ఆకట్టుకున్న కోమల, ఈ ఘనత ద్వారా బాపట్ల పట్టణానికి ప్రత్యేక గుర్తింపును తెచ్చారు.
ఎస్ఎస్ కన్వెన్షన్ హాల్లో నిర్వహించిన ఈ పోటీలలో రాష్ట్రవ్యాప్తంగా 25 మందికి పైగా పోటీదారులు పాల్గొన్నారు. ఫ్యాషన్, సంస్కృతి మరియు టాలెంట్ వంటి పలు రౌండ్లలో జరిగిన తీవ్రమైన పోటీలో, కోమల తనదైన శైలిలో రాణించారు.
ముఖ్యంగా, ప్రశ్న-జవాబు రౌండ్లో ఆమె ప్రదర్శించిన పరిణతి, సామాజిక బాధ్యతపై ఆమెకున్న అవగాహన ప్రత్యేక ఆకర్షణగా నిలిచింది.
కోమల సాయి స్వస్థలం బాపట్ల పట్టణంలో భీమావారిపాలెం. తండ్రి గతంలో బాపట్ల మున్సిపల్ కమీషనర్ గా పనిచేసి ప్రస్తుతం అమలాపురం మున్సిపల్ కమీషనర్ గా పనిచేస్తున్నారు. ఆమె ఈ ప్రయాణంలో పడిన శ్రమ, కుటుంబ సభ్యుల ప్రోత్సాహం అంత ఇంత కాదు.
ఈ విజయం సాధించడానికి ఆమె ఎంతగానో కష్టపడ్డారని, ఇది కేవలం బాహ్య సౌందర్యానికి సంబంధించిన పోటీ కాదని, వ్యక్తిత్వం, ఆత్మవిశ్వాసానికి ప్రతీక అని ఆమె అభిప్రాయపడ్డారు.
రన్నరప్ విజేతగా నిలిచిన తర్వాత మీడియాతో మాట్లాడుతూ, కోమల తన భవిష్యత్తు లక్ష్యాలను పంచుకున్నారు. ఈ వేదికను ఉపయోగించుకుని మహిళా సాధికారత,విద్యావ్యాప్తి కోసం కృషి చేస్తానని ఆమె పేర్కొన్నారు.
ఆమె విజయం స్థానిక యువతకు స్ఫూర్తిదాయకంగా నిలుస్తుందని పట్టణ ప్రజలు హర్షం వ్యక్తం చేస్తున్నారు.
---------------> (శ్రీకాంత్ కోండ్రు,బాపట్ల)